நீ பெரியவளாகிவிட்டாய்

நீ பெரியவளாகிவிட்டாய்
பெரிய மனுசி நீ
உன்னிடம் சில புதிய
குணங்களும்
பூப்படைந்து விட்டது

உன் வயது நிறைந்த
குழந்தைத் தனங்கள்
காணாமல் போய் விட்டது
இன்றெல்லாம்
நீ நீயாகவே
நடந்து கொள்கிறாய்

நாம் அன்று
குடிசை அமைத்து
சமைத்து விளையாடிய
மண்சட்டிகள்
வயதுக்கு வந்திருந்தால்
என் நிலை என்னவாயிருக்கும் ..??

துடுக்குத் தனங்களையும்
துடிப்புகளையும்
உன் தாவணி
ஒளித்துக்
கொண்டிருக்கின்றது

அன்று
கொஞ்சல் பூசும்
முகங்களில் இன்றெல்லாம்
மஞ்சள் பூசிக்கொள்கிறாய்
கூடவே
வெட்கங்களையும் சேர்த்து...!!

உன்
சிறுபிள்ளைத்தன
விளையாட்டுக்களை
நான் மீண்டும் தேடுகின்றேன்
இந்தப் பூப்படைதலில்
அவை எங்கு
புதைக்கப்பட்டனவோ???